“Somos dos últimos en chegar e, ao contrario que outros compañeiros da zona, temos unha estrutura empresarial. Ademais temos posibilidades de investir e non temos présa por obter resultados, queremos facer bos viños”.
Sendo historicamente unha zona de importante produción de viño, a superficie de vide foi moito a menos na conca do río Mandeo en anos recentes, minguando en poucos anos o número de adegueiros que embotellan e comercializan. Nese contexto, o ambicioso proxecto de Pagos de Brigante é un novidoso e recoñecido esforzo por virar as cousas e unha nova oportunidade para o emprendemento no eido da viticultura na comarca de Betanzos.
Luís Sande, alma mater do proxecto, está totalmente convencido do potencial dos viños de Betanzos. Durante a súa vida profesional como funcionario estivo dedicado ao control da produción en distintas zonas vitivinícolas, primeiro desde Galicia e despois desde Bruxelas, polo que é un bo coñecedor tanto dos viños galegos como dos do resto de España e de Europa.
Na súa opinión, a herdanza de falta de prestixio que ten lastrado os viños da zona é hoxe un recordo afastado no tempo diante dos caldos que están abrollando na IXP Terra de Betanzos. Sande destaca o terroir único da área betanceira e afirma rotundo que os viños de Betanzos teñen aínda por facer ese mesmo percorrido que nas últimas décadas fixeron os viños das denominacións de orixe de Galicia e que están a empezar tamén na actualidade outras zonas con IXP.
Pagos de Brigante é unha aposta decidida pola profesionalización dos viños de Betanzos, por convertelos en homologables en calidade aos que xa se fan noutras zonas de Galicia e do mundo, pero mantendo as características que lles son propias e que os diferencian.
Xunto con seu fillo e un equipo profesional, pilota unha iniciativa con vocación empresarial que mesmo se ten involucrado no proxecto europeo ECOSPHEREWINES, destinado a mellorar os servizos ecosistémicos prestados polas paisaxes agrícolas do viñedo a través da implementación dunha rede de infraestrutura verde en zonas de alto valor ecolóxico como estratexia enfocada á súa conservación e xestión sostible, mellorando a biodiversidade e aumentando a súa resiliencia fronte ao cambio climático.
