Desde 2005, Lorenzo Bescansa elabora o seu viño branco, con cepas de Branco Lexítimo, en terras de Betanzos e sobre as ribeiras dos ríos Mandeo, Mendo e Marulo. O Branco Lexítimo, verdadeira xoia que empeza agora a descubrirse, combínase sobre o terreo con Agudelo e Serradelo. Adegas Lorenzo Bescansa posúe a maior plantación en Galicia de clons autóctonos da variedade Branco Lexítimo. De feito, revélase como a primeira adega de Betanzos que elaborou Branco Lexítimo e Agudelo.
Desde aqueles inicios, alá por 2005, continúan sendo unha pequena empresa, moi persoal, moi pegada á terra e ao país, con elaboracións artesás tanto en campo como en adega.
Coidado persoal, atención aos detalles e gusto polo ben feito, para un concepto artesanal do proceso que reúne formación, rigor técnico e coñecemento científico. Estando á fronte da adega un experto enxeñeiro agrónomo, titulado pola Politécnica de Madrid, garántese ese extra adicional que explica as calidades altamente especiais dos seus viños.
En 2015 a prestixiosa publicación de Robert Parker publicou unha reseña do catador Luís Gutiérrez sobre o viño “Lorenzo Bescansa 2012” onde apunta, entre outros, o seguinte: “Fiquei realmente impresionado por este branco fabuloso que ven dunha zona completamente esquecida que mestura notas de brisa mariña, pedernal, fiúncho e pedras moídas (…) Este é un viño de carácter, realmente, unha sorpresa agora accesible e perfecta con mariscos ben iodados. Porén, dada a súa mineralidade e acidez, sorprenderíame que, pouco a pouco, non desenvolvese unha maior complexidade en botella. Bravo!”
As mans de Lorenzo Bescansa tratan estas viñas co amor de quen, traballando como asesor externo para adegas de toda Galicia e para o CSIC, garda aquí o seu propio recuncho íntimo. O seu branco ten un 85% da variedade Branco Lexítimo e un 15% de Agudelo, cunha gradación de 12º. Vinifícase a temperatura controlada e non se somete a procesos de fríos nin de estabilización, razón pola que poden atoparse sedimentos. En cata, trátase dun branco novo, con certa complexidade e frescura vertebrada por unha excelente acidez e largura. A produción aproximada é dunhas 5.300 botellas.
.
