O pai de José Crusat, Francisco Crusat, é quen funda a adega, aínda que xa desde antes de 2002 elaboraba viño; primeiro para consumo propio, logo para os amigos. No ano 2006 a partir da unión das asociacións de viticultores de Barbanza e da zona de Iria Flavia forman a IXP Viños dá Terra do Barbanza e Iria con 4 adegas amparadas: ademais da propia Adega Entre os Ríos na Pobra do Caramiñal, estarán inicialmente a adega Boal de Arousa en Padrón, Adega do Moucho na parroquia de Xuño en Porto do Son, e a adega Antonio Saborido en Boiro.
A adega está localizada na Pobra do Caramiñal e dispón de viñedos propios nun 70%, sendo o resto procedente de viticultores da zona. Sitúanse nunha zona localizada na área norte da ría de Arousa con vertentes sur-suroeste, chans graníticos e xistos propios da península do Barbanza. Os viñedos propios proceden dos clons do Convento da Mercé e foron seleccionados entre as cepas máis vellas da zona hai máis de 30 anos.
Actualmente Adega Entre os Ríos ten 1,8 hectáreas en propiedade e controla e traballa outra, alén de comprarlle uva aos mesmos viticultores desde hai anos, o que representa unha hectárea adicional de cultivo. As cepas, fundamentalmente Albariño, aínda que con algo de Treixadura, Raposo e algo de castes tintas, teñen idades de entre 15 e máis de 50 anos, e están plantadas en chans graníticos, de xisto e algo de terra de aluvión. Os rendementos son duns 7000 Kg/Ha (aínda menores que os permitidos pola IXP). Destacan que no viñedo abandonouse desde hai anos o uso de herbicidas, e téntase facer os mínimos tratamentos posibles. Todas as fermentacións levan a cabo en inox co fermento indíxena dos viñedos, e téntase limitar ao mínimo o uso de sulfuroso. A produción total da adega é de entre 15.000 e 25.000 botellas anuais.
Na adega elabóranse actualmente cinco viños brancos, dous deles baixo o control e a supervisión de Francisco (Casal do Monte e Altares de Postmarcos) e nos outros José Crusat dá renda solta á súa creatividade (Vulpes Vulpes, KomoKabras, KomoKabras Verde e KomoKabras Amarelo). Ademais, hai viñificacións “experimentais” con uvas tintas. As instalacións complétanse coas naves de elaboración e embotellado, que contan cunha moderna tecnoloxía.
