“Sen as nosas viñas nada sería posible, e é por iso que merecen todo o noso agarimo. Herbicidas, insecticidas e acaricidas non son usados nas nosas viñas”, defenden desde a adega Cazapitas.
O proxecto Cazapitas salienta a gran diversidade xenética das vides galegas e defende traballar un gran número de castes. Á hora de faceren os seus viños brancos, cóntanos da importancia do seu traballo de lías para dárenlle carácter e lonxevidade aos seus viños. Alén diso, nos tintos destacan que se caracterizan por unha longa maceración duns vinte días compaxinado con barricas que non son novas para que non desapareza a froita.
Tamén defenden a recuperación do viño con Ratiño, unha pequena e selecta produción de apenas dous centos de botellas e cóntannos da súa estratexia de vendima máis cedo na procura dun viño “con máis acidez e frescura”.
