“A uva sempre formou parte das nosas vidas, non só para facer viño. Había vides como quen tiña cerdeiras… Meu pai xa as coidaba e ademais forma parte da nosa cultura”. Xosé Antonio Meixide está á fronte de Adegas Bordel, unha adega familiar que transforma as uvas cultivadas nun predio da súa propiedade en Sarandós, que está no límite da IXP, a 200 metros de altura, no Concello de Abegondo, no recanto coñecido como “Ladeiro”.
Nunha área integrada na Reserva dá Biosfera Mariñas Coruñesas e Terras do Mandeo, a familia mantén actividade vencellada a diferentes actividades agrarias, nas que a viticultura ten a súa máxima expresión a través dunha caste, con presenza secular neste territorio, a Branca Lexítima.
A adega está integrada no Marco de Calidade Turística do Ministerio de Industria, Comercio e Turismo. (SICTED, Compromiso de Calidade Turística) e forma parte dun roteiro de agroturismo. Os seus promotores teñen o compromiso de pular contra o abandono das terras e poñer en valor a viticultura na comarca. Na actualidade van camiño de dobrar a pequena área de produción inicial, de media hectárea, cara a unha hectárea total de cultivo vitícola.
