A forma de cultivo sostible, con control dos procesos pero fomentando a fermentación espontánea, sen usar lévedos ou outros produtos e o esforzo en prol da recuperación de solos con gran potencial, son os valores diferenciais destacados por José Luís Bouzón Beade, quen segue a tradición de seu avó e fundador da adega, José Antonio Beade. Por tras, unha longa tradición familiar vitivinícola na comarca de Betanzos.
“Elaboramos viño de mesa, e a creación da Indicación Xeográfica Protexida Viño da Terra de Betanzos alá polo ano 2000 veu a representar un gran impulso para nós e en xeral para todos os viticultores, animando a modernización das nosas pequenas adegas tradicionais. Supuxo tamén ter que replantar con variedades de calidade, mellorar o cultivo da viña, os tratamentos, ata a propia elaboración do viño con técnicas máis modernas”.
Defenden desde a Adega Beade que a arela de seu traballo é conseguir que o consumidor se achegue aos seus viños con curiosidade: “Son viños novos, frescos e que non ocultan a súa orixe, pois a través do viño pódense identificar as características dos nosos solos e o noso clima”.
